ريفيو للمجموعة ماسكات الوجه الحالية / face mask collection review 2017

ياأهلا وسهلا ،،

على السناب تشات كل فترة أتكلم عن ماسك جديد أستخدمته وأعجبني

وكل فترة تجيني طلبات أرجع أتكلم عنها من جديد

فقررت أجمع كل الماسكات اللي أستخدمها حاليا مع ريفيو سريع لها.

أول وأهم شي لازم تعرفون نوع بشرتي لآنه يختلف كل ماسك من بشرة للثانية.

بشرتي عادية إلى جافة بالشتاء تجف أكثر وبالصيف أحيانا تزيد الدهون حول الأنف بالذات.

بس بشكل عام عادية.

نبدأ بالماسكات الكورية

Egg White Pore Mask Skin Food

ماسك للمسام من خلاصة بياض البيض من الماركة الكورية سكن فود.

بياض البيض معروف انه ينظف ويضيق المسام حتى قبل كانو يستخدمونه لإزالة للرؤوس السوداء.

أول انطباع ريحته مره حلوة تخيلته بتكون شينة الصراحة😂

لاحظت بالمنتجات الكورية دائما ريحتها عطرية

وحبيت قوامه كأنه كريمة ♥

اول شيء لاحظته بعد ما غسلته النضارة😶♥

حبيت مره حسيت بشرتي فريش ونظيفة وملمسها ناعم 💕

المسام حسيت شيء بسيط صارت أصغر بالذات المنطقة حول الانف👌

تقيمي له 10 من 10

بطل الريحة + القوام + النتيجة المتوقعة ♥

دائما أعتمده قبل الميك أب عشان يطلع الفاونديشن نظيف والبشرة منورة😌

Milky Piggy Carbonated Bubble Clay Mask Elizavecca 

ماسك الفقاعات    الطين الكربوني

أحب هذا الماسك مره لأنه يخلي بشرتي فريش ونظيفة وملمسها ناعم وفيها نضارة💕

ميزته انه سريع 3-5 دقائق ويغسل ما يحتاج يجلس ربع ساعة لين يجف.

هو فكرته أنه تمدينه كأي ماسك عادي ثم يبدأ يكون فقاعات وينتفخ

ممتع الصراحة يضحك الشعور ويدغدغ شوي بعد

مفعوله يشبه ماسكات الطين بس بدون احساس الجفاف

يناسب اللي تبي نظافة ونضارة وبشرتها حساسة او جافة👌🏻

تقيمي له 9.5 من 10

نقصته نص لأن غسله شوي صعب فصرت اعتمده مع الشاور.

بعد من الماسكات اللي اعتمدها قبل الميك آب يجنن.

Skin Food  Rice Mask Wash Off

ماسك الأرز من ماركة skin food الكورية🇰🇷

+

Skin Food Black Sugar  Mask Wash Off

‎ماسك السكر الاسمر من ماركة skin food الكورية🇰🇷

وصف المنتجين:

ماسكات مقشر تحتوي على مكونات مميزة لتغذية البشرة مثل الفواكة والنباتات الطبيعية والارز الذي يعمل على تنقية وتفتيح البشرة🌱

يتشابهون كثير أنهم يقشرون بلطف

الفرق بينهم أنه الأرز يرطب أكثر فيناسب البشرة للعادية للجافة والسكر الأسمر يقشر أكثر وترطيبه أقل فيناسب البشرة الدهنية للمختلطة.

تقيمي لهم 10 من 10

يقشر ويرطب بنفس الوقت.

بطل الريحة + النتيجة المتوقعة ♥

من الماسكات المثالية قبل الميك آب يعطون نضارة وينعمون البشرة بدون جفاف.

‎طريقة استخدمهم:

‎ يوضع على بشرة نظيفة ومبللة ثم مساج خفيف، نخليه على البشرة لمدة 10-15دقيقة ثم ينغسل بالماء

المنتجات الكورية للبشرة دائما تفوز بنظري 👏

peel off mask

ماسك الفحم للروؤس السوداء،

ماسك لونه أسود يحتوي على خلاصة الفحم و يساعد على إزالة من الرؤوس السوداء و من الممكن استخدامه على الوجه 
كاملا أو على الأماكن رؤوس السوداء فقط .

عن نفسي احطه ع كل وجهي لأنه يشيل حتى القشور البسيطة وينظف المسام من قلب، والشعر الوبري.

تقييمي له 10 من 10
قبله كنت استخدم ماسك جيلاتين وحليب الحين استغنيت عن هذي الحركة مؤلمة كانت 
وصعب احيانا توصلين للقوام المطلوب، 

وبعد يغني عن لصقات الرؤوس السوداء حقت الأنف.

وبعد هذا الماسك استغنيت عنهم  😍

نجي لأسوء ماسك بنظري

Elizavecca Green Piggy Collagen Jella Pack Pig Mask for Wrinkles Intense Hydration

هذا الماسك اللي خلا هالماركة تشتهر في كوريا .
حتى كان من الماسكات الأفضل مبيعاً عندهم.
وطاحو فيه بشكل هو بإختصار ماسك ترطيب فيه نسبة ٥٠٪ كولاجين 
ومستخلص زيت بذور المكاديما والكاكو اللي يساعد على الحصول على بشرة ناعمة كالأطفال.

أنا من النوع حتى وبشرتي جافة ماأحب ماسكات الترطيب أحط كريم وخلاص 
وأحس ماسكات تنظيف المسام والتقشير أهم.

لكن أثارني الفضول أجربه بعد كل المدح اللي سمعته.

تقييمي له 3  من 10

ماأعجبني أبد كأني أحط كريم واغسله ما شفت نتيجة.

حتى أختي جربته ونفس الشي.

جربته بعدة طرق هم كاتبين حطي شوي وشوي مساج وخليه على بشرتك.

جربت هالطريقة وأحس نشفت بشرتي ولا استفت شي.

حطيت طبقة سميكة وغسلتها بعد ربع ساعة زي باقي الماسكات كان أوكي

 بس برضو وين بشرة البيبي ؟!!

أخر شي صرت أحطه على يديني كماسك قبل البس القلفز.

نجي لماسكات الطين

Queen Helene, Mint Julep Masque, Oily andAcne Prone Skin

ماسك طيني بالنعناع من كوين هيلين .
مره حلو وسريع اذا تبين بشرتك تخف دهونها أو فيه حبة تبينها تختفي بسرعة.
(يجفف الحبوب أسرع).

الماسك يوعد بـ:

يعطي البشرة احساس منعش ويتركها نظيفة ناعمة.

مناسب للبشرة الدهنية والمعرضة لحب الشباب.

للبشرة المختلطة أو الدهنية والمعرضة لحب الشباب 👩

لم يتم اختباره على الحيوانات ❌

تقيمي له 10 من 10

سريع ينظف من قلب بذات حوالين الأنف يصير ملمسه ناعم.

European clay powder

يشبه ماسك الطين الهندي المشهور، هذا الماسك معالج وينظف البشرة من قلب،
الفرق بين الطين الهندي والأوروبي أنه أخف جفاف من الهندي يمكن لأن بشرتي تميل للجفاف ماأحتاج شي يجفف جدا.

للبشرات الجافة كاتبين بالموقع ممكن يضاف له قطرات من أي زيت زي جوز الهند أو الجوجوبا أو الافندر

وكمان ممكن يخلط مع زبادي أو جل الصبار.

ويستخدم لعلاج دهون الجسم وفورة الرأس

جربته قبل الشاور احط من منه ع الفروة مباشرة وأغسله بالشامبو والبلسم وانتعشت فروة راسي.

ممكن بعد يعالج الرائحة أو القشرة.

 متعدد الاستخدامات من جد.

تقيمي له 8.5 من 10

أحيانا يتكتل ويحتاج خلط كويس، إذا اضفت خل تفاح تروح هذي المشكلة وينظف أكثر.

طريقة الاستخدام:

ملعقة طين + ملعقة ماء ممكن تستخدمين مويه ورد

القوام يكون سلس (مو ثقيل ولا مويه خفيف) وزعيه على البشرة بفرشة أو أطراف أصابعك وابعدي عن العين والفم

اتركه 15-20 دقيقة، اثناء ماهو على وجهك بتحسين انه يقرص ويشد شوي بالذات اذا بشرتك حساسة.

derma e anti wrinkle vitamin a glycolic

يحتوي على فايتمن آى و حمض جليكوليك.

هالمكونين معروفين للتجاعيد لمكافحة الشيخوخة عشان كذا تحمست اجربه.

هو ماسك طيني أبيض جاهز.

تقييمي له7 من 10

لأنه زيه زي أي ماسك طيني عادي ماشفت شي من المذكور.

بس حلو كماسك طيني ،ما أطول فيه لأنه يحسس بشرتي اذا طول ويجف بسرعة.



* الماسكات الطينية بالغالب لها نفس النتائج 
( تقلل إفراز الدهون، تنظف وتضييق المسام، تطهر البشرة، تمنع تكون الرؤوس السوداء).

Dead Sea mud mask

ماسك طين البحر الميت.

توني طالبة هذا الماسك وما بعد استخدمته.

بس سمعت مدح كثير له فتحمست أجربه مره حتي بعضهم يفضله على الماسكات اللي قبل.

من الأول قبل حتى لا أبدأ عناية وماسكات كنت أسمع أنه البحر الميت يروحون السياح له 

عشان يسبحون فيه من كثر ماطينه لها فوائد رهيبة.

حلو أنهم وفروه لنا بعلب وجاهز للاستخدام مايحتاج نسافر له :)

أجربه بإذن الله وبخبركم بالنتيجة.

بعض فوائد طين البحر الميت للبشرة :

فعال لإزالة الجلد الميت، ينقي، يخفف من زيوت البشرة.

يساعد على تحفيز الدورة الدموية مما يحسن لون الجلد وملمسه.

يخفف من مظهر التجاعيد والخطوط الرفيعة.

يقلل من حب الشباب وآثاره.

يعالج الأمراض الجلدية.

يقلل من مظهر السيليولايت.

ويساعد طين البحر الميت على أمراض مثل:

التهاب المفاصل

تصلب العضلات

الجلد والحكة والألم

الصدفية

حب الشباب

الأكزيما

تشقق القدمين

الشوائب

الفطريات

وأخيراً  ،،،

أغلب هالماسكات مناسبة لقبل الميك أب.
 بس شخصيا ما أستخدم ماسكات الطين قبله لأن بشرتي تميل للجفاف فبيجففها زيادة.
الماسكات الكورية أفضل خيار للي تبي نظارة ونعومة ولمعة صحية.
وقبل الميك آب مثالية.

خلاصة الريفيو ما تحتاجين كل هالماسكات يكفي ماسك طيني بالذات اذا دهنية + ماسك مقشر منها يقشر ويرطب بنفس الوقت + وماسك peel off  اذا تحتاجين شي للرؤوس السوداء.

والاستمرارية مهمة هالماسكات مو سحر تحتاج مداومة زي أي عناية بالحياة، وبتلقين نتيجة حلوة إن شاءالله.

ماننسى شرب الموية كثير والتغذية الجيدة.

وبس والله إن شالله إستفدتو.
وشاركوني بتجاربك أحب أعرف أرائكم وتقييمكم.

أغلب الأشياء اللي ذكرتها وفرتها لكم على طلبكم ببوتيكي 

هنا

مدونة هير افكت
Her Effect Blog

twitter + instagram + snapchat = hereffect