صباحكم / مساؤكم سعيد
بعد مواضيع سلسلة روتيني للعناية بالشعر اللي حبيتوها مره
كثير جتني أسئلة عن روتيني عن العناية بالبشرة
ايش استخدم لتنظيف البشرة والميك أب
الكريم المناسب والغسول وغيرها.
ببدأ بإذن الله سلسلة روتيني للعناية ببشريتي :
أول شي ببوست أدوات تنظيف البشرة اللي جربتها.
بعدها روتيني اليومي + روتين تنظيف البشرة من الميك أب.
أخرشي كيف اتخلص من حبوب البشرة بأسرع وقت وأمنع ظهورها.
ببدأ بأجهزة التنظيف اللي جربتها قبل:
(طبعا هذي تجربتي الشخصية اللي مرتاحة مع أي شيء ذكرت أنه ما ناسبني هنا الله يهنيك فيه ولو تذكرين تجربتك بكون سعيدة)
Sigma Cleansing and Polishing Tool
جهاز تنظيف البشرة من سيقما
قديم صدق أتوقع حتى قطعوه
جهاز يشتغل على البطارية
وجاي معه رأسين للتنظيف + رأس للمساج مع الزيوت أو الكريمات + ورأس زي الحجر لتنظيف الأقدام.
كان اول تجربة لي لأجهزة تنظيف البشرة.
وعرفت بعده إني وأجهزة تنظيف البشرة مو أصحاب.
مشكلتي الأولى معه أن كل الرأسين حق التنظيف كانوا قاسين على البشرة
مع ان واحد فرشة عادية وواحد زي الربر للبشرة الحساسة.
أول كم يوم كنت مبسوطة عليهم لين استوعب ان بشرتي حرقتني منهم فوقفتهم
المشكلة الثانية هذي الرؤوس تحتاج تغيير بشكل دوري كل ٣ شهور وهكذا وما حبيت هذي الفكرة
مثل جهازي هذا انقطع من السوق فكيف بجيب له رؤوس جديدة كل فتره؟
وهالكلام ينطبق على الكلارسونيك مع الفرق الفظيع بالسعر اللي اعتبره مبالغ فيه
من كم سنه جت هبه الكلارسونيك وكان كأنه من أساسيات أي بنت يكون عندها
مع أن مو كل البنات تسمح ميزانيتهم ولا أشوفها ضرورية للبنات اللي ما يحطون فل ميك أب بشكل كثير أو لسى بشراتهم صغيرة.
Pure Complexion Facial Sponge
بعدها طحت بالصدفة على الكونجاك سبونج وكانت أحلى صدفة
مره ناسبتي وانبسطت عليها ومن سنين استخدمها ومرتاحه عليها
جدا جدا مبسوطة عليها تنظف وتنعم من قلب.
حاليا مستغنية عن أي سكراب بشره بسببها ماأحتجت لأي شي معها.
شويه معلومات عن هذي السبونج العجيبة؟
هي منتج من شرق أسيا هم أول ما اكتشفوا وصنعوها وصاروا يستخدمونها لاستخدامات كثير
مصنوعة من مكونات طبيعية ألياف نبات الكونجاك + البامبو
هذا شكل النبته المستخرجة منها لسبونج سبحان الله عجيبة!
بنظري مميزاتها كثير:
١- سهل استخدامها.
٢- اقتصادية جداً
٣- تنظف البشرة من قلب والميك أب.
٤- سهل نقلها بالسفر
٥- سهل تبديلها.
٦- مناسبة للاستخدام اليومي
٧- تنظف وتطهر المسامات والبشرة وتسوي تقشير بسيط لسطح البشرة.
٨- للي تعاني من سرعة ظهور الرؤوس السوداء استخدامها ممكن يؤخر ما تظهر بسرعة.
٩- خالية من المواد الكيمائية وأي عطور.
١٠- صديقة للبيئة لأنها تتحلل بسهولة.
كيف تستخدم؟
السبونج قاسية مثل الحجر أول ما تتبلل تصير لينه جدا مثل السفنج.
نفس فكرة البيوتي بلندر تبلل بالماء ونعصر المويه منها نمسج الوجه بحركات دائرية الأفضل نبدأ المنتصف حتى الأطراف ونمسج الوجه بلطف بالذات حول العيون ونتجنب أماكن الحبوب قدر الإمكان.
كاتبين ممكن نستعملها بدون غسول، لكن شخصيا أفضلها مع الغسول وأحطها مباشرة على السبونج.
إذا خلصت من تنظيف بشرتي أعصرها كويس وأعلقها تجف تماما (نقطة مهمه مره عشان ما تجمع بكتيريا) هذا الكلام ينطبق على أي سبونج عندك.
موجودة بأمازون
FOREO LUNA PLAY
كل أجهزة تنظيف البشرة أتوقع انها هبه بالنهاية
هذي كانت الهبه بعد الكلارسونيك
فيه ماركات كثير طلعوا نفس الفكرة بس أتوقع فوريو لونا هي الأشهر.
الشي الوحيد اللي خلاني ممكن أجربها إن ما يحتاج لها رأس يتغير هذي ميزة مهمه مره عندي للاستمرارية.
غير أنهم يدعون إن نوع الربر المستخدم ما يجمع بكتيريا مثل غيره
طلعوا لها أحجام كثير وألوان كل لون وحجم لنوع بشرة أو استخدام
لما طلعوا البلايplay- اللي هي تجي ببطاربة جاهزة ل ١٠٠ استخدام وحجمها صغير للسفر هنا تحمست أجربها، وقلت مره وحده إذا ناسبتني اشتريت الحجم الأصلي
بعد التجربة المريرة مع جهاز سيقما.
أول انطباع كانت لطيفة على البشرة تنفع حق استخدام يومي هذية نقطة إيجابية.
بعدها بشرتي تكون نظيفة وناعمة.
لكن سلبياتها ما تنظف المكياج زين مقارنة بالكونجاك أبداً فرق كبير والله.
حرفيا مع المكياج مو قاعدة تنظف شي.
ولا تأخذ شكل الوجه والثنيات بسهولة مقارنة بالكونجاك على أن حجمها صغير جدا.
لكن ونجي عند لكن
كاتبين انها ضد الماء لكن بالصدفة كان بعلبتها اللي احتفظ فيها شويه مويه مالاحظته.
من بكره جيت لقيتها متعطلة وطالع منها صدأ؟؟
انقهرت جدا وايقنت ان صدق أنا والأجهزة مو أصحاب.
ووين الوعود أنها تستخدم بالشور وضد الماء؟
EcoTools Facial Cleansing Brush
أخر تجربة لي قريبة لهذي الفرشة من ايكوتولز نفس ماركة اسفنجة الكونجاك
حمسني لها شكلها مثل شكل فرش تنظيف الوجه وذكروا انها ناعمة على البشرة ومناسبة للبشرة الحساسة
كنت قاطعة وعد على نفسي مأغير الكونجاك ولا أشتري أي جهاز تنظيف بشرة جديد
بس ما انها مو جهاز مجرد فرشة قلت ليش لا؟
أول انطباع لما استخدمتها كانت قاسية على البشرة!!
إذا لمستها باصابعي جداً ناعمة لكن بس تلمس وجهي تصير خشنة مره.
عطيتها فرصة إلى ٣ أسابيع مع ميك أب وبدونه
منظفته لي زين أبدآ على كثر ماهي قاسية
الكونجاك تظل انعم وتنظف أفضل منها.
مااعجبتني أبداً وصرت أستخدمها لجسمي.
خلاصة الكلام السابق
الكونجاك تفوز تفوز تفوز من كل النواحي.
وبس الي حابه تجرب جهاز لتنظيف الوجه لونا موب سيئة بس عن نفسي الكونجاك بعلق عليها فترة طويلة جدا.
نصائح مهمة (tips) :
١- دائما دائما أسمعي لبشرتك وعطيها للي تحتاج كل بشرة تختلف عن الثانية ولها احتياجها ما فيه أبد أحد يقدر يحدد وش مناسب لكِ آو لا، إلا إنتِ عن طريق التجربة أو دكتورة الجلدية.
٢- المبالغة بالترطيب أو كثرت استخدام منتجات مالها داعي بالعكس ممكن يكون تأثيره سيء مثله مثل الإهمال ممكن استخدام طبقت من السيروم والكريمات تسبب انها تسد لكِ المسام وتطلع حبوب، ياكثرهم البنات اللي حولي تكون ماتعتني بس تبدأ وتشتري طن منتجات من مدح فلانه وعلانه أخر شي تسبب لها مشاكل بالبشرة أو قلها حتى تتعب من كرة المنتجات.
٣- وبعد المبالغة بتقشير وتنظيف بشرتك بالفرش ممكن يكون سبب بجفاف البشرة، بالذات اللي بشترهم دهنية مايحتاج تبالغين بالتنظيف على أساس تشيلين الزيوت على البشرة أحيانا المبالغة بالتظيف واستخدام منتجات كثير تجفف الدهون ممكن يسبب جفاف طاهري عالبشرة وبالتالي يزيد افراز الدهون لأن البشرة تفهم أنه بشرتك ناشفه وناقصها ترطيب.
٤- مو شرط الماسكات الطبيعية تكون دايم مفيدة للبشرة لأنها طبيعية، فيه أشياء لو ممكن تأثر على بشرتك لأنها طبيعية وانتِ ما تدرين مثل ليمون أو العسل أول القرفة فيه ناس تتهيج بشرتهم من هذي المواد.
٥- عشان منتج أو شيء مدحوه الناس ما يعني أنه بطل ولازم يناسبك، مثل جل الصبار عن نفسي كنت مقتنعة ومتأكدة أنه شيء رائع ورهيب وصرت أحاول أدخله بكل شيء لبشرتي وشعري وجسمي إلى اكتشفت بعد سنين أنه هو السبب بالحبوب اللي كانت تطلع لي (طبعا أستخدمت ٣ منتجات مختلفة فيها جل الصبار وكلها سببت لي حبوب بشكل موب طبيعي).
٦- اذا جيتي بتستخدمين أو تدخلين منتجات جديدة أبدي بواحد كل مره عشان لو ما ناسبك أو طلعت لكِ حبوب تعرفين من ايش بدل لا تشترين منتجات جديدة كثير ولا تدرين وين المشكلة بالروتين أو بأكلك أو مجرد هرمونات؟
٧- إذا كنتِ من البنات اللي ما يحطون ميك أب ثقيل إلا بالمناسبات ما تحتاجين تنظيف بشرتك كل يوم بجهاز تنظيف الوجه.
هير افكت بلوق
Her Effect Blog
لا تنسون تضيفوني على السناب والانستقرام لتفاصيل أكثر
twitter + instagram + snapchat = hereffect
