(hair loss + vitamin D deficiency) \ روتيني للعناية بالشعر الجزء٣ تجربتي مع علاج نقص فيتامين د + أسباب تساقط الشعر..

يا هلا والله ومرحبا

لما طرحت موضوع روتين الشعر كثير جو سألوا اذا الشامبو الفلاني مفيد للتساقط او الزيت الفلاني يوقف التساقط!!!!

"مافيه زيت أو شامبو يوقف التساقط"

العناية الخارجية للشعر تبقى خارجية أبد ماتحل مشاكل الشعر زي التساقط وغيره.

هذي علاجها من جوا الجسم.

هذا البوست تجربتي الشخصية

أشاركها معكم عشان كثير بنات يجهلون أسباب التساقط فيصيرون ينتبهون لها..

بس أول شي نتفق على نقطتين:

أول شيء لازم تسوين تحليل عند دكتورة مو من نفسك تاخذين أدوية أي كانت.

الشي الثاني أنا مو طبيبة ولا مختصة هذي تجربة شخصية بحته.

أغلب بناتنا عندهم تساقط شعر من أسباب مره بسيطة مثل سوء التغذية ـ نقص الحديد ـ لخبطة  هرمونات -

التساقط الوراثي أو الصلع الوراثي المبكر للنساء - خلل بالغدة درقية

(نقص فيتامين D)

هو اللي بركز عليه اليوم لانه كان مشكلتي + كثير ماتوقعون نقصه يأثر على الشعر..

مو طبيعي نقصه قد ايش يأثر على الشعر والجسم

- الآلام بالعظام كلها أعراض نقصه..

و اللي دورتها غير منتظمة هذا أكبر دليل عندك مشكلة ولازم تراجعين دكتورة.

دكتور طلال المحيسن ذكر أهم ٤ تحاليل مهمة عشان مشكلة التساقط

اللي هو (الحديد – فايتمن د – زنك – الغدة الدرقية)

نجي لتجربتي:

قبل ٣سنوات تقريبا سويت تحاليل لهذي الحديد وفايتمن د

طلع الحديد طبيعي.

والصدمة !!

 بفيتامين د طلع عندي (٩) مره نازل

الدكتورة قالت كيف تقدرين تمشين، ماتوجعك عظامك ؟

طبعا المعدل الطبيعي اللي مفروض يكون فيه هذا الفيتامين

بين ٥٠ - ٢٥٠

وعشان يوقف التساقط لازم يكون فوق ٧٥.

وصفت لي قطرات فيتامين د السائلة المعروفة مره بالأسبوع

وقالت يبي فترة كم شهر على ما يرتفع

والحمد لله قبل تقريبا سنة رجعت حللت ولقيته طبيعي والتساقط صار طبيعي

كثير يكتفون بالشمس كمصدر لفيتامين د.

أنا مقتنعة لو أحد عنده نقص مارح تفيده الشمس يحتاج ياخذه دوائيا.

بالذات الشمس لها مضار على البشرة.

تصبغات - تجاعيد - نمش - وتحرق البشرة بشكل.

من الاساس مااحب أحساس حرارتها.

وهالكلام قاله دكتور أحمد العيسى بعد.

هنا

بشرتنا الخليجية كونها تميل للون الحنطي أو الأسمر.

ماتستقبل أشعة الشمس وتنتج فيتامين د مثل مثل البشرات الفاتحة

من شفت هالصورة وانا صدق اتجنب الشمس زيادة.

هذا سائق شاحنة لمدة ٢٨سنة وكان بس نصف وجهه يتعرض لأشعت

 الشمس

وهذة هي النتيجة !!!

واللي أكد لي زيادة.

أحد البنات ذكرت لي تجربتها مع علاج النقص

تقول دوامي كله بالشمس احترقت منها

مع هذا الفيتامين ناقص ولا نفعتني بشي!!

عشان كذا مهم نستخدم كريم واقي شمس على الأماكن اللي تتعرض للأشعة الشمس.

من الأسئلة الإسئلة اللي وصلتني كثير بعد موضوع روتين شعري.

اذا شامبو الأطفال زين للشعر؟

الجواب المختصر: لا

الجواب المطول شوفوا الفيديو

هنا

الحين السؤال المهم ...

كيف نفرق بين التساقط الطبيعي والغير طبيعي؟

الأطباء بالعادة يقولون فقدان بين ٥٠-١٠٠ شعرة باليوم يعتبر بالمعدل الطبيعي 👌

واذكر مره سمعت ببرنامج The doctors

انه إذا مشيتي ايدك بين شعرك وكل مره تطيح اقل من ١٥ شعرة فهو طبيعي ✨

أكثر من كذا يعتبر مرضي

طبعا برفق بدون معط شوش 🌚😂

طبعا لا اخفيكم قبل هالكلام كله كان عندي هوس بعدد الشعرات اللي تطيح مني

كنت اعدها شعره شعره عشان أتأكد ماوصلت للعدد الغير طبيعي

ماكان له داعي هالهوس 😂

عشان كذا اقولكم لاتصيرون مهووسات مثلي الشعر مو ماث بالحساب يمشي😛

اللي شعرها طويل طبيعي بيبين كأنه يتساقط اكثر من القصير بسبب طول الشعره نفسها✨

أفضل طريقة هي تحليل الدم

واتركوا سالفة فيتامينات الشعر اللي يحطون تركيزات عالية مره من فيتامينات مايحتاجها الجسم وتتركز فيه 😅 

 اذكر مره شفت فيتامين للشعر فيه نسبة ١٠٠٠% من فيتامين A وين يحطها الجسم هذي؟ A مايذوب بالماء ويطلع من الجسم؟

كل الفيتامينات تذوب بالماء وممكن تطلع من الجسم

إلا هالفيتامينات الأربعة: A,K,E,D

الجرعة الزائدة منه تبقى بالجسم وتذوب بالدهون وتتركز بالخلايا الدهنية.

والجسم صعب يتخلص منها كونها ذائبة بدهون الجسم مو بالماء

لذلك كل الفيتامينات وهذي الأربعة بالذات ما تؤخذ إلا باستشارة طبية عند نقصها

فيتامين A مثلا زيادته تسبب تشوهات بالأجنة.

وأحد تجارب البنات اللي حاكوني .

إن الدكتور منعها من أخذ فيتامينات الشعر ولا سمعت كلامه واستمرت عليها

إلى أن حصل لها تساقط مو طبيعي بسبب زيادته بجسمها.

وبالأخير أتمنى لكم شعراً جميلا صحياً

أحبكم .

هير افكت بلوق

Her Effect Blog

حساباتي في السوشال ميديا

twitter + instagram + snapchat = hereffect